"Pathian pennak chung ah aa tongthiammi a um lo. Pathian nih zeizong vialte hi a nawlngaimi hna caah a tawlrel cia dihmi lawng te an si."
March 2025
Nihin rian ah ka hawinu te nih cauk pakhat laksawng ah a ka pek.
"The Miracle Morning" by Hal Elrod a si i, ka hawinu nih "zingkaa thawh kaa harh tuk na ti i, mah cauk te hi kan siaherh tuk" tiah a ka ti.
Bawipa dawtnak in ka rianttuannak ah kan mah tein kan ttuan thawk caan thimnak nawl kan ngei.Zingkaa thawh kaa harh tuk tawn i 8:00 AM hlan ah cun rian ka thawk kho bal lo.
Laksawng lak ah cauk laksawng hi ka sunlawih tuk mi a si i, rel lai zong kaa ngaih tuk. Zingkaa tuan te thawhkhawh zuamduh ding tiang tu cun mah cauk nih a ka bawmh lai tiah zumhnak ngantuk cu ka ngei ngam lem lo.
****
May 2025
Hlan ah cun ka duh mi ka tuah, ka duh mi kaa thim hnu le, harnak ka ton i bawmh ka herh hnu lawng ah Bawipa ka hlam tawn.
Nikhat hnu nikhat zeitluk in dah Bawipa dawtnak a ngan zia le a dawtmi a fa le kan caah zeitluk in dah Bawipa nih thlachuah pek le thilttha co ter a kan duh ti kaa fian hnu cun, zeithil tuah lai poah ah Bawipa sin ah chimh hmasa le a kut cung ah uptak lo in ka um kho ti lo.
Bawipa dawtnak in a mah nih ka mit a ka au ter i, tukum summer classes ka rak lak hlan ah Bawipa sin ka up hmasa. Bawipa nih ka thlacamnak le bawmhhalnak a ka theih piak i tlamtling tein a ka dih ter. "Managing Global Teams" timi class pakhat ka lak chih i, kan Professor hi Poland nu a si. Vawilei cung ramkip kal in mi phun kip he rian a ttuan tti mi a si i, a hmuhtonnak tampi a kan cheuh. An mah ram Poland miphun pawl kong zong tampi a kan hrawmh fawn.
Mah class kan cawn mi cu, miphun dang, ram dang he zeitin dah ttha tein (effectively and efficiently) rian kan ttuan tti khawh lai ti mi zong a si. A hlei in, Asians, EU, American pawl he rian ttuan tti tik ah zeidah theih a herh, zeidah ralrin a herh, zeitin in tuan ah tlamtling tein hmaa a kal i zeitin dah one team mindset in kan ttuan tti lai timi kong a kan cawn piak.
Ka pawngkam hawi open mindset a ngei mi le, hopoah he tluang tein rian a ttuan tti kho mi hi ka u pat tuk hna i, an mah bantuk si ve zong ka saduh tthah a si peng caah, mah class nih cun a ka bawmh ngai te tiah ka zumh.
****
August 2025
Bawipa dawtnak in ka saduhthah a tling, hmailei caansau caah ka lungtlitum a si mi rianhmun ah kaa tthial kho.
Ramleng/International program a si i, ka ttuantti pawl hi Switzerland, Poland, UK, le US an si. EU pawl cu an biachim a direct, an formal tuk, i a herh mi le rian he aa pehtlai mi lawng chim an hmang/duh. Kan nih US lei hi kan direct ve ko nain, rianhe a pehtlai lo mi biachim kan hmang pah tawn. Company pakhat, team khat kan si ko tik ah kan nih US lei hi formal tuk in chimrel kan hmang tawn lo. Summer i ka rak cawnmi le kan professor nih a rak kan cheuhmi theihhngalhnak nih tampi a vun ka bawmh, ii harh tuk nak um lem lo in tluang tein rianttuan hawi thar he hmunkhat ah rian kan ttuan tti kho.
Kan Program hi a bik in Poland he direct in ttuan tti a si. Poland cu US nak in nazi pasarih (+7 hours), a ttuan i an mah he meetings ngeih caan hi kanmah US lei zingkaa 5:30 AM te hna ah a si tawn. Zingkaa thawh aa harhtuk mi ka si nain, rian nih a pek cang caah har ngai in zingkaa ka tho. August thlakhat cung cu tem ngai tein zingkaasik deihlan in meetings he ka rianttuan ni ka thawk.
Rianthar a si bantuk in cawnawk tam tuk ka ngei. Nikhat ah nazi 12 chung te hna ka ttuan tik ah ka pum nih a celh lo i, dinh ni ka herh tiah timh ciam mam tein day off lak kaa tim. A herh tak mi tuah awk ka ngeih dah lo cun, timh ciammam tein rian off lak ka hmang bal lo, i a tu hi a voikhatnak kaa timh a si.
****
September 2025
Ka off ni a vun phan.
Ka pum nih aa ziak cang caah, 5:00 AM kaa hlau tthiam.
Ka tho. Bibile ka rel. Thla ka cam. Bawipa nih ka thinlung chung ah rian aa tttuan i lungdai tein le lungfim tein zingkaa caan a ka hman ter. Ruah lo pi'n Ka hawinu pek mi cauk ka lung ah a vun chuak i notebook he cauk rel kaa thawk.
Tuan tein thawh cu ka caah a fawi bal lo, asinain mah cauk nih zinglei nih a hleiin tthawnnak a ngeih ti kha a ka theihter - a thar in thawk khawhnak, dai tein thlacam khawhnak, ruahnak thar i lak khawhnak vialte hi zingkaa te thawhnak in hmuhkhawhmi an si.
Zingkaa te thawh i nazi pakhat chung ah a tanglei pawl hi minutes 10 ceo pek in tuah khawh ah cun thathnemnak tampi a um:
- Meditation - to be peaceful
- Affirmation - to feel empowered
- Visualization - to feel inspired
- Reading - to feel motivated
- Journaling - to be grateful
- Exercise - to be energized
Dai tein deihlan ah zeidang hlan ah Bawipa he biaruahtti nak ngaihnak nih a thar in ka zumhnak a fehter tthan, ka ruahnak a thian ter i, ka kehlan kip cu amah nih a khiahmi a si ti a ka theihter tthan.
Hlan ah harnak bantuk in ka rak ruahmi cu thluachuah ah a cang. Cun, ka nunnak ah ka tonmi thil vialte cu ka hmailei caah Pathian timhtuahnak a si ti zong kaa fiang.
Pathian pennak chung ah aa tongthiammi a um lo. Pathian nih zeizong vialte hi a nawlngaimi hna caah a tawlrel cia dihmi lawng te an si.
Bawipa kaa lawm.
