Second Time

Roadtrip kalnak ah ticket ka mih. A voihnih nak speeding ticket ka ngah a si. Poi ngai lol. Herh lo ah tangkaa tamtuk ka dih ding a si. Kal lio cun a nuam ngai nain tangkaa pek caan phanh cun nuam ti lo lol A voikhat nak ticket ka ngah khan ruah awk ah ka thei lo i tangkaa ka pek colh hna. Tutiang ka driver record ah speeding ticket ka ngah mi aa piah i insuance ka cawk tik ah a man a fak khun. Tutan cu ticket man liam lo in defensive driving class tu kai ka tim. Court ah ddc kai ka duh tiah ka request hna. $115 request man ka pek. Cun online in ddc cu ka kai. $30 ka pek rua.. cun kan pass nak certificate kuat nak ah $25 ka pek hoi...a tuah awk a tam ning hi. Online class kai hrim nuamh lo ning hi.. chunitlak nazi paruk chung ka rau....ka lu zong hik dih. Forward/fast ter khawh zong si lo..ka rim cik cek... tangkaa dih si, caan dih si, nuam lo tuk lol

Xmas lai ah ticket kong ah ka buai :( ka rim ngai ve i a ttha pah ko. Achel caan cun harnak tonmi hi fimchimtu an si tawn. Ka motor mawngh a cian pah i tucu ka ralring ngai cang..keimah ca zong ah a ttha i pawngkam ca zong ah a him. Meng hna ruk reng deuh ka mawngh ruang ah ka timhnak hmun tuan deuh ah ka phan hlei lo lol cu nak cun rianherh si ka theih cun tuan deuh tu ah ka thawh cang hihihi...

A Perfect Destination 2

Tukum zong Houston ah ka phan kho tthan. Lakewood Church pumh duh ah ka hawi le kan kal. Nikum cu timh ciammam tein kan kal nain tukum cu ruah lo pin kan i tim. Sunday morning 5 ah thawh i 10 ah phanh ding in kan i tim hna. Roadtrip kal nih a ka lem. Motor mawngh pah in hawi he bia sawng tlorh pah hla ngaih pah cu a nuam bak ko. Nazi sau mawngh zong ah bat theih a si lo. Kan bia a thawt tuk nak ah speeding ticket zong ka mih lol 70mph ah 95mph in ka mawngh. mah tluk a reng in ka mawngh zong kaa thei manh lo nain police nih a dan dawi ai... zeiti ttha lol

Houston kan phanh cun 10:50am a si cang. 11am ah pumh thawk si. Kan thil zong kan i thleng rih hna lo. Parking kan kawl colh. An parking a ngan tuk i park nak hmun chikhat te ah kan hmuh. Vanpang lei hoih in a ki lei te ah kan park i kan thil kan i thleng hna hehehehe lol Thutnak a hmai lei ah kan ting ti lo i hnu lei nawn ah kan tthu. Joel nih phung a chim lo i ka hawi le cu an ngeih chia ngai:) Mi leng an ngei i phungchim an hoih. A phungchim a ttha tuk. Thazang tampi kan i lak. Thla an kan cam piak. Hla kan sa hna. Daw te le nuam tuk in an kan dong.. minung thong in pumh nak biakinn ah mah tluk in mileng chawnhbiak an thiam ning hi ka ti...

Pumh dih cun 12:45pm a si. Kan paw a ttam tuk i ei nak lei ah kan choi. A fawinak ah tiah nikum kan kal nak Sushi Robata Japan dawr ah kan kal. An dawr a dawh tuk, a thiang tuk nain an rawl a thawt lo ning cu ttah chuak bak a si. Nikum kan cah mi rawl pawl kan hal hna i kan menu kan thlen cang ti a si i. Zeiti ttha kan ti i thaw lo nabu tein kan i hnek hna... Kaa thawt lo rawl ei a har ning hi!!!!

Rawl kan ei dih in i tthumnak hotel kan kawl hna. Chikhat te ah kan duh mi kan hmuh i kan i din hna. Vantthat ah US open Tennis an tuk lio a si i dinh pah ah ka zoh. T le B cu an zuam lo. An darling he an i text hna rua... kan ba ngai i biazong kan i ruah kho hna lo. Dinh lo in caan sau motor ka mawngh nak ah ka ke a phing... a phin ka thei lo i kedilsang denh buin nazi pahnih deng pumhnak ah ka tthu. Hotel kan phanh hnu lawng ah ka ke fah ka theih nain tennis ka zoh nak ah ka philh colh :)

Ti kan kholh hna i biakinn ah zaan pumh ah kan i thawh hna...pumh dih in vah beh kan duh i thil hruk ding ah kan buai hna ning hi..Nazi pakhat leng kan rau..vui zeizah kan thil kan thlen ka rel cawk lo. Pumh kan hnu deng hoi lol Zaan cu mino pumh a si i chuntluk in mi kan tam lo. Nikum kan rat ah khan an mino pastor pa phungchim ka rak ngai bal cang. Uar um kho tuk. Amah tthiam nih phung a chim tthan:):):):) Nupi a ngei cang hahahha fa pahnih an ngei lol ka uar tthiam ko...

Pumh a dih.. vahnak kan ruat..Sunday night a si i vahnak um lo. Ei awk kan caw i kan hotel ah kan ttin. Biasawng kan tlorh tthan. B nih a uar pah mi te a um i keimah phone number in kan tuai hahaha kawlram high school kai lio zong ka ngai dih. Saupi tiang kan tthu kho lo kan ba tuk i :P Zingkaa 10am ah kan tho. Vah nak kan kawl...rawk kan ei.... cun kan i thawh tthan dallas lei ah ....

FAITH

Ka tial ka hnawh, ka ttial ka hnawh tthan. Zei ttial awk ka thei lo. Chim awk tampi ka ngei. Tial ning tiah an chuak kho fawn lo. August thla in tutiang zeihmenh ka ttial kho rih lo. Ziah ca na ttial ti lo tiah aka hal mi ka blog mileng pawl zong leh awk ka thei hna lo. Ka tlau:) August thla cu ka chuahthla a si i kum dang cun ka nuam tuk tawn nain tukum cu zei tin dik ka um. Kumkhua upat lei sang a phanh caah ma asi hnga? Ka kum upat tluk in ei bar ka chuah lo caah ma si hnga? Ka kum ka tuak i lungzawtnak ngei hnek bantuk in ka um :P Pawngkam caah zei hmenh ka tuah khawh mi a um lo. Tuah duhmi an tam tluk in tuah khawh tak mi zeihmenh um lo. Caan nih le an liam. Laitlang lei ngaihchiatnak a tongmi hawikom cingla rualchan pawl zong bawmh khawhmi zeihmenh ka ngei lo. Thlacam piak lawng hi a za lo ti ka theih ko nain....

Saya David lah Dallas aphan i a thawngttha bia ka va ngai kho ve. Attha tuk lawlaw. Thazang tampi ka lak. Minung kan nunnak hi thingkung bantuk asi ka ti. Vawilei cung harsatnak nilin tang ah kan um ko zong ah Pathian thawngttha bia he kan nun ah cun tiva kam i a kho mi thingkung bantuk in fek tein kan dir kho lo lai. Lenglei cu harsatnak nih a phanh khawh hmenh ah hmuhkhawh lo mi chunglei kan hram cu Pathian sin ah kan bunh ah cun him te le fek tein kan dir kho tthiamtthiam ko lai. Saya David Lah nih a chimmi cu "minung hi Pathian nih kanmah le kan sining tein a mah sunparnak caah a kan hman dih ko. Harsatnak na tong ruang ah na ngaihchia hlah. Nangmah bantuk in a tong ve mi na hawikom, na pawngkam kha thazang pek i zuam hna. Nangmah nih na tonbel cang mi a si caah nangmah thazang peknak kha hmual a ngei khun lai i nangmah ca zong ah damnak a si lai." a ti. Cun kan mah le kan dirhmun ah fek tein dir i Pathian nih akan chiahpiak mi rian kha zumhawk tlak tein kan ttuan awk a si. Phungchim a thiam mi kan si dih lo, duh tawk in mi bawm kho ve mi mirum, mi ngei kan si dih hna lo. Pawngkam cawnpiak kho tu fimthiamnak sang a ngei dih mi kan si hna lo. Asinain tuah khawhmi kanmah le kan zawn tein kan ngei dih hna. Midang kha va zoh i an tuahmi kip va tuah ve awk ah Pathian nih a kan fial lo i a duh zong a kan duh piak mi a si lo. Mah le dirhmun te theih buin a rian ah zumhawk tlak si tu kha a kan duh piak mi a si deuh. 

Kan minung sinak in cun fawi tawn ve lo. Thil ti kho deuh kan hmuh hna ah kan lung a dong tawn. Fimthiamnak sang a kaikho mihna kan hmuh ah ka tha a chia tawn. Herhbaunak ngei lo in a nung kho mi chungkhar kan hmuh hna ah ka sining he kan tahchunh i ka ngaihchia tawn. Pathian nih a dawt khun hna rua tiah kan ruah caan zong um men lai. Nain, Pathian nih a kan dawtnak hi akhat dih ko. Kan sining kan zoh tak ah cun Bawipa vel hi a za tuk ko. Ngandamnak a kan pek mi hmenh hi chimcawk lo in lawmh awk a si. Lungdong lo in fel tein kan kawl ah cun Pathian nih kan caah a chiahmi laksawng kan hmuh khawh ko lai. Lawmhnak bia chim buin thangthatnak hla sa peng hna usih. Ka lungthin dihlak in Pathian caah hmunhma kan pek ah cun Satan tukforhnak nih a kan tei kho lai lo. Thangthatnak hla sa peng hna u sih. Ngaihchiatnak kan ton caan zong ah thangthatnak hla in Pathian he naih khawh chin i zuam hna u sih. Zeidang vialte nakin Pathain Pennak le zeidah tuah hna seh ti a kan duh timi kha biapi deuh in ruat hna u sih law thil dang vialte hna zong a kan pek tthiamtthiam ko lai. 

Hmmm tial ka timhmi le ka ttial tak mi a pehtlai lo ngai. Lakewood Church ka kal nak kong ka rak ttial tthan te lai. Tulio cu Pope Francis  US ah a kan tlawn lio a si. Tuni cu Rome ah a kir tthan cang lai.  Caan ka ngeih fate CNN ah live in an thlah mi ka zoh i ka nuam tuk. A mithmai dawtnak in a khat. Minung tamtuk thinlung ah hnangam daihnak a kan pek.  Athar in ruahchannak, zumhnak le dawtnak a phortu Pope Francis Pathian nih ngandam, nunsau nak pe hram ko seh.

We Are With You Hakha!

Laitlang kan dawtmi kan hawile nih an ton mi ngeihchiatnak le harnak hi kan si khawh tawk in hnemh le bawmh khawh i zuam ve hna u sih. 

http://www.gofundme.com/ldo210

Ramttha kan phan. Rian le Bill he kan buai len ko hna lai nain himte le zalong tein kan nung kho. Cu lio ah Laitlang kan hawile tampi cu inn ngei lo le umnak thei lo in mitthli he an um lio a si. Bawmh khawh rak i zuam ve uh tiah kan nawl hna. Dawtmi kan ram te kha na mitthlam ah hei cuan ter ve hmneh. Na ngeihchia tuk lo maw? Thlacam le hmurka lawng nih a zat lo dakaw. Tuahsernak in langh ter ve u sih!

Wonderful Counselor

To Daddy, Love Dingdi!

Kawlca in siseh,
Mirangca in siseh
Cun, Laica in...
"Ka Pa" timi biafang ka ttial tawn ve.

Pa le dawtnak ka ruah caan ah
Voitampi ttap in
Kan hlam tuk tawn.

Mangttha ti hmenh cahtak manh lo'n
Kumkhat fanu zungzal ca'n na ka kal tak.

Ka nu chim bang
Ralkut cung ah na nunnak a liam hi
Ram le miphun caah ti'n
Ka hnem tawn na'n...

Fanu pakhat ka nunnak ah
Voikhat te hmenh
"Ka pa" tiah auh venak caan ka ngeih lo cu
I hnemh a har ko.

BitterSweet KARMA

June thla ni 5 ah kawlram tanghra sungh/awn a chuak lai ti asi. It kho lo'n ka lungre a thei. Keimah tanghra ka rak kai lio khan zeihmenh ah ka rak rel lo. Pyin Oo Lwin a sawng ah ka rak um. A min thantuk ruang ah ka chung le nih an rak ka chiah nain ka huatbiknak hmun a rak si. Ka hmailei lamthluan ahrawktu zong a si. Ka ruah tthan poah ah ngaihchih awk lawngte.... caan le tangkaa pam in eibar ka rak chuah lo ning kha!!!! Hawithar tampi ka chap i cazoh lo in ka rak vaivuan. 

Result chuah ni cu kan family hmai ka rak zoh ngam hna lo. Rawl ei lai zong ah ka phuhrung. Tuah awk thei lo le umnak ngei lo in ka ning a rak zak tuk. Ho hmenh nih tha tein an rak ka chawn lo. An ka hrial, ka hrial ve hna. An thin ka hunh tuk hna ti ka theih. ka mipum ning pi'n tlau khawh siseh law tha tuk hnga ka ti! Ka tuh bantuk tein ka zun ...

*********

Ka tu pa te tanghra a kai cu amah nak in keimah ka ba deuh. Ka lungre a thei peng. Keimah bantuk ah a chuah lai ka siang lo tuk. Tanghra zeitluk in a biapit fian ter ka duh tuk. Ka manh caan ah phone chawnh khawh ka zuam peng. A nu (ka u) nih "ca a zoh cangkaa ngut hram a thawk" a ka ti tawn. Sik awk ah ka harh ngai. Keimah lio zong ka rak si ve ko. Cazoh cu chim lo cauk ka kau cang kaa haam hram ka thawk, ka mit an maw i ka lung a rit. Ngut cu chim lo, mang manh colh ka tim peng. Tanghra phanh kum hrim in thathut a zual. Ka fiang tuk i ka tu pa te zong ka si ngam tuk lo. Nain, men men tein a awng lai ka phang. Mark ttha huaha lo in awn ah cun kawlram si ning he cun hmailei tthanchonak lam a fawi lo. Ka rak ton cang mi lam zulh ter ve lai ding ah ka siang lo tuk! 

**********

Viber in ca an ka kuat. Rian ka ttuan lio a si i ttah lo ka zuam. Ka mithmai a chia tuk i coka lei ah chikhat ka va um ta. A awng, D pahnih lawng a hmuh tiah a nu nih thawng a ka thanh. Khuaza ka ruat. Keimah lio i ka u le an mitthli ka rak tlak termi hna kha a tu cu keimah cung ah pei a tlun hi ka ti. Atlawm bik D pali te tel cu hmukho seh ti ka duh tuk ning hi. Thlazong ka cam tawn. Sik awk ah thazang ka ngei lo. Keimah lio kha ka ruat. Ruahchannak nganpi an rak ka ngeih piak, thetse lak ti toih bang keinih nuamhnak tu ka rak i thim. An rak ka si lo, nain an mitthli a tla, an rak ttap. Fungfek in ka vel hna sehlaw tuar afawi deuh hnga ka rak ti. 

Maw ka thin! Tucu ka fiang cang mu...

Short Term Gratification

"cazoh zuam lo caan le sianginn ca'h aherh mi tuah ding thil na tuah zuam lo caan ah zei tin dah tuah duhnak thinlung ngeih na zuam?"

"Zeinih dah tuah duhnak thazang an pek?" 

tiah kan professor nu nih a kan hal.  

Cheukhat nih,

"Camipuai sungh lai kong ka ruat, class nolh tthan lai cu a si kho lo tiah ka remind. Mah hnu cun ca ka zoh kho deuh" an ti.

Tamdeuh nih cun,

 "ka phone ka phih chung i tuah awk ka ngei ti lo. Mah lawng ah ca ka zoh" an ti. 

**********

Ka sianginn upnak receipt ka print i ka cabuai hmai ah ka tar. Ba ngai in rian ka ttuan bu tein ka hmuhmi tangkaa in sianginn ka kai i cazoh zuam lo nak thinlung a chuah fa tin mah nih cun a ka remind. 

Hmailei kum rauh hlan ah ka hmuh hnga mi thil, ka tinh mi kong ruah peng ka zuam i mah nih zun ca zoh duhnak thazang a ka pek peng. Grade tthat bal biapi ah ka chia bal lo. 

Sunday CCN nih concert an tuah. US um laimi hlasak thiam pawl an ra hna i zoh ka duh tuk ve. Nain, sianginn lei ca ka dih rih lomi a um i ka kal kho lo. Ziah ahlan tein ka rak tuah cia lo ee tiah sual ka phaw. 

Lengchuahnak dang ka ngei lo i tubantuk caan cun chuah khawh ka duh ngai. Nain,....ka kal kho lo.

************

Ka project hi tuah ding ah thlakhat caan ka rak ngei. Tulawng ah ka thawk...sual ka phaw pah nain hnutuk rih lo i kaa ngaithiam tthan. Sianginn kan dih hnu in kum 20 chung kan salary, outflows le inflows pawl kha plan i calculate a si.

Tuhnu kum kul ah zei dah a cang lai chim khawh asi lo. Tinh mi cu caan zeitluk rauh hmenh ah lak khawh i zuam ding hi minung lei nih kan tuah hnga ding mi rian a si i a dang cu Pathian kut ah up dih ding an si ko. Concert kal lo in project ka tuah caah tuzan cu ka lung zang i  ka hngangam....mah caah ka blog zong ka vun hlam ta manh <3

Tinhmi thil hmuh khawh ding ah cun caan tawi nuamhnak he i hlat rih ka hau ko...

Dear God,

Thank you for giving me a bright future.

Thank You for giving me peace in my heart.

Thank You for loving me and setting me free.

Thank You for being with me in the storms of Life.

I know that You have a Wonderful plan and Purpose for me.

Please guide me and show me Your ways as I put you First in all things in Jesus's name.

Amen.

FOREVER

V For Victory!

"The More You Know, The Less You Need "

"Hawivial an vanthat hna ning!" Sianginn kai tti hawi he kan i ton hna caan ah ka hram tawn. Full time in an kai. Khuasaknak caah lungre theih awk pipa an ngei lo. Nule pa le nih an dir kamh hna. Van (Luck) a um lo, Luck cu mah tuahsernak cung ah a mu-tti (depend) an ti. Sitak hnga ma?

Tutan cu ka voikhatnak bik fulltime sianginn kai a si i ka ba ngai. Kum upat lei sang cun zeipoah pei an har thluahmah cang ko hi ka ti :) Nikhat ni in nili ni tiang sianginn ah caan ka dih. Dinh caan ah library ah ka kal tawn. Sianginn ngakchia tam deuh cu keimah nak in an ngakchia deuh rua hna lai dah ka ti. Or, keimah le keimah dik upa tuk in ka ruah! lol  Building pakhat le pakhat kalnak ah 10 minutes te hna a rau. Zingkaa ka class hi parking in 9minutes a hlat i gym ah exercises va tuah len hmenh pei ka hauh lai lo hi ka ti. 

Bag pack nganpi pi he sianginn ah kan i thawh hna. Class chung kan phan. Notebook kau hlan ah tam deuh cu phone ka tawng hna. Saya te nih zeihmeh an chim lem lo. Tangkaa tampi na pek i na lak mi class a si, ca cawn na duh lo le na duh in tlong ko ti si rua. Breaktime ah leng a chuakmi siang ngakchia an um tuk lem lo. Phone in FB deuh ah break time an hmang. Class a dih. Cauk chah chah cu kau hmenh kau huaha manh lo in bag pack ah khumh tthan an si. Thluak chung ah zeizah dah kan khumh manh cu ka thei lo. 

"No Girl is A Failure Who has Good Friends"

Hawitam pi ngeih a duh lomi kan um lai ka zum lo. Hawi kom ttha cu sui le ngunnak in a sunglawi deuh tiah ka ngakchia lio tein ka rak theih nain ka rak i fiang lo. Pathian nih thlachuah aka pek i ka kalnak poah ah hawittha ka tong peng. Tutan zong sianginn ah hawithar hawittha pakhat ka ngei. Keimah nak in kumhnih a ngakchia deuh. Kan ram a dang, kan biaknak a khat lo. Anu le pa le he US ah an umnak 20years a si cang. Unau paruk an si i keimah bantuk in big family members an si ve. Kan major a khat nain semester pakhat in a ka lonh i tuan deuh ah a graduate lai. Sianginn ah rian a ttuan pah i thil tam tuk a thei. Ka herh nak vialte a ka bawmh dih. A lak ciami class lawng te ka la lio i a cauk vialte zong a ka hlanh dih. Tangkaa ka ngeih lo he Pathian nih pei vanmi a rak thlah ko hi ka ti.

Kan family kong bia kan i ruah tawn. Cathiam family an si. A u pahnih hi college ah ESOL sayamah an si i a tu kan kainak university ah master an kai lio fawn. A ttapa hi Engineer a si ve. Cun a nau le pahnih cu kum 15 tang a si. Caan tawite kar ah zeitin dah mahtluk in kan i komh manh ka thei lo, ka caah Pathian thlachuah pakhat a si. 

Once Out of 365 Days

Nizan cu Valentine's day a si i kan rian tam lawlaw. Nidang nak in tuan deuh ah kan dawr kan on. Nungak tlangval a duh mi lawng te in kan dawr cu khat ko. Dawtu dawtmi ngeih cun ni fa te hi Valentine's day a si awk a si ko nain...Feb 14th theng lawng i pangpar cawkpiak in dawtnak langhter len lo khin.... ;) Anti Valentine's Day tiah ka ruat sual lai ci uh :) ka si lem lo... 

Nain,  

A real man can make everyday Valentine's day for his girl.

V for Victory 

Tangka ka ngeih lo ruang ah ka lungrawk tawn. Fimnak ka chanbau ruang ah ka lung dong deng leng mang. Herhbaunak in akhat mi vawilei ah zumhnak thazang a der caan a tam pi. Ruahchannak ngan bik Jesuh keica tiah hlasak pah in thinlung mitthli a luang tawn. Nain, zeizong te a ngei tu, fimnak hrampi cu Pathian lawng lawng a si ko. A ka dawt caah a ka kal tak bal lai lo. 

"If God is All you HAVE, you HAVE All you Need.

Dear Brother

I am proud to call you my brother both today and everyday!!!!!

UNBROKEN

Don't be pushed by your problems, be led by your dreams. Ralph W Emerson

Hello 2015!

Sunday in ka zaw i tutiang ka dam kho lo. Dam lo bu'n rian ka thawh. New Year Eve cu kan busy tuk i ka dam lo he ka cei sup ko. Customers ka chawnh pah lio hna ah ka aw a tlau, holh kho lo in ka um caan a um. 9:30pm ah kan dawr kan khar nain 11:25 tiang ka ttin kho lo. Ka dam lo si, ka tha um lo si, bat si, pawttam si...rawlthaw tak an kan chuan piak nain kan ei kho hna lo. Kan bat tuk hnanak ah. Tin a za i ka nuamh ning! Innleng a kih ning cu ka keng zong fak chin dih. New Year Eve zaan hi motor accident a tam khun an ti i ralrin deuh tein mawngh kaa zuam. Palek zong lam ah an tam khun i speed an khiah mi lonh lo ding ka zuam pah. Inn ka phanh hlan deuh ah ka tta nih message a ka kuat. "12 hlan ah inn na phan kho lai ma? Thla kan cam tti hna lai." tiah. 

Inn chung ka luh bak ah 11:58pm a si. Ka tta nih "Happy New Year!" tiah a ka don. Ka u le cu an it diam cang. Keimah le ka tta lawng bible kan rel i thlacam kan i tim. 12:00am tlin cangkaa in ka dawtmi hawi le message kuat colh ka duh hna nain thlacam dih tu in ka kuat te hna lai ka ti i ka phone cu ka phih chung. Ka tta nih "khah bible cacang thim law thla kan cam lai a ka ti." 

"Be strong and courageous and do it. Do not be afraid and do not be dismayed for the Lord God, even my God, is with you. He will not leave you or forsake you, until all the work for the service of the house of the Lord is finished." 1Chronicles 28:20 

Ka ihnak khan ka phanh ah cun 1am a si deng cang. ka thil ka thlen hlan ah ka hawi le pawl kumthar wishes ka wish ta hna. 12am tlin hlan  1min aa duh ah in ka hawinu pakhat nih a rak ka wish diam cang :) ka chim leng mang cang ko nain ka chim tthan ko lai. Hawitam pi ka ngei lo nain ka ngeih mi ka hawile nih an ka dawt ning hi Pathian thlachuah a si. Ka dawt tuk ve hna. Pathian nih a ka pek mi ka theihhngalh le ka tlaihchanmi pawl vialte hi mittha lawngte an si i an ka dawt, an ka tlaihchannak ka khan-sa khawh tuk. Aka dawtu nan zate cung ah ka lawm. Ka caah Pathian thlachuah pekmi an si. Ka lawm..ka lawm tuk! Ka hawi pakhat nih bible verse kumthar laksawng ah a ka kuat. Bible kaa lak i ka kau; John 1:16 "From the fullness of His grace we have all received one blessing after another." Bawipa vel hi ka ca'h a za hrim ko. Thlachuahnak pakhat hnu pakhat in a ka petu Bawipa na cung ah ka lawm!

Ihnak cung ka phanh ah cun 2am si cang. Ka paw ttam tuk ko nain zei ei hmenh ka or chuak lo. Si tu ka ding i blanket tang ah ka lut. Ka bat tuk fate tuan ah ka hngilh kho bal lo. Khuaza ka ruat. Kum liam a fawi ning ka ruat; ka ning tti! Kumthar ka resolution ka ruat. Ka resolution cu kum dang he akhat ko. Kum hlun nak in (a tthatnak lei in) a dang deuh mi si khawh hi ka resolution a si. Hlan ah cun ka thin tawi (tu zong tawi ko nian ka rel deuh ngai:), mi nih cu tin an ti kha tin an ti timi nih ka lung a ka buai ter tawn. Tlanger nger tein bia chim hmang mi he bia ruah ka rak i harh tuk. Mikong ah athlak tukmi pawl ka mit an kem. Tucu...pawng kam bia le hla, tuahsernak nih ka lung an buai ter kho lem ti lo. "Your beliefs don't make you a better person, your behavior does." an ti. 

Deilei 5:25am ah ka hlau. Pawttam buin si ka din i ka ri, ka buhri. Ka tho. Coka ah eiawk ka kawl. 6:30am tiang coka ah ka tthu. Ih tthan ka tim nain ka mit ku ti lo. Ka taksa fak. Ka cauk hrawl ah rel awk ka kawl. Kawlram cattial thiam Sayamah Juu ttialmi "Huatnak ruang ah a chuakmi ral pawl" timi articles ka rel. Kawlca rel ka ngaih ning hi! Sayamah Juu cauk thar pakhat hmenh ka rel kho ti lo i ka ngeihchia. Cauk ttha he kaa hlat nak sau tuk :( Huatnak nih achuah pimi thil hi ttih an nung tuk. Ramkhat le ramkhat karlak lawng si lo in miphun khat chung zong in huatnak ruang ah i doh khawh a si. Zumnak, ruahnak, pom mi khah lo ruang zong ah huatnak a chuak. Zeibantuk biaknak hmenh nih thatlonak tuah a kan cawn piak lo. Asi nain biaknak kong hrim in ral tamtuk a chuak cang. Sualnak ngei lomi minung tamtuk an nunnak a liam. Hibantuk in a chuakmi ral cu hohmeh nih daih ter khawh a si lai lo... huatnak thinlung a ngeimi hna lila nih dah ti lo cun....

Nazi 7:45am a si cang. Ka mit kuh le vuai lo, nain ka hngilh tthan kho ti fawn lo. Ka cauk relmi a dih. James Patterson ttialmi  "First Love" timi cauk ka hlan i hmai thum li lawng ka rel rih. Ka peh lai tiah ka hei lak...kumthar zingkasik i love story rel lai zong cu tiah..ka chiah tthan. Ruah a sur. Fak in a sur lo. Blinder karlak in innleng ka cuan...mei tang ah ruahhmai siam siam atla mi hmuh khawh an si. Meitang ah lam cu atleu in an tleu. 

Bawipa nithar phanh khawhnak caanttha na ka pek caah ka lawm! Na ka dawt tuk caah ka lawm!

Hello 2015!